Oliver Stone satanískur að sögn Ahmadinejad

Mahmoud Ahmadinejad, forseti Írans hefur afþakkað boð leikstjórans Oliver Stone um að gera mynd um hann, á þeim forsendum að Stone sé hluti af satanísku menningarveldi að sögn Fars fréttastofunnar írönsku.

Stone, sem hefur unnið fjölda Óskarsverðlauna, hefur gert kvikmyndir um Bandaríkjaforsetana Nixon og Kennedy, og heimildarmynd um Fidel Kastró Kúbuforseta.

,,Ég sendi neikvætt svar Ahmadinejads til Olivers Stone" sagði Mehdi Kalhor, fjölmiðlaráðgjafi forsetans á sunnudag. Hann bætti því við að vissulega væri Stone ekki hlynntur yfirvöldum í Bandaríkjunum, en sagði: ,,Meira að segja andófsöfl í Bandaríkjunum eru hluti af Mikla Satan".

Hugtakið Mikli Satan var fyrst notað af erkiklerknum Ayatollah Khomeini, sem kallað Bandaríkin þetta eftir íslömsku byltinguna árið 1979, þegar Bandarískt-studdum keisara landsins var steypt. Það er mikið notað um Bandaríkin í yfirlýsingum stjórnvalda í Íran.

Upplýsingafulltrúi Stone í New York sagði að leikstjóranum hefði ekki verið tilkynnt formlega um að boði hans um að gera heimildarmynd um Ahmadinejad hefði verið hafnað.

Í yfirlýsingu sem leikstjórinn sendi frá sér á mánudaginn óskar hann írönsku þjóðinni velfarnaðar. ,,Ég hef verið kallaður allskonar nöfnum, en aldrei Mikli Satan" sagði Stone í yfirlýsingunni. ,,Ég óska írönsku þjóninni alls hins besta og vona bara að reynsla þeirra af vanhæfum, einstrengingslegum forseta verði betri en okkar"