Brown ætlar að leyfa mótmæli við þinghúsið

Gordon Brown, sem sest í leiðtogastól breska verkamannaflokksins í dag og tekur við embætti forsætisráðherra á miðvikudag, ætlar að leyfa mótmælaaðgerðir fyrir framan þinghúsið í London. Tony Blair hafði á sínum tíma sett strangar reglur varðandi mótmælaðgerðir fyrir framan bygginguna en Brown ætlar að fella þær úr gildi.

Þetta kemur fram á heimasíðu breska blaðsins Sunday Telegraph og segir að ákvörðunin sé liður í því að friðmælast við mótmælendur stríðsins í Írak.

Lögin sem Brown er sagður ætla að fella úr gildi banna öll ólögleg mótmæli við þinghúsið og þurfa mótmælendur að sækja um leyfi hjá lögreglu með sólarhrings fyrirvara, hyggist þeir efna til mótmælaaðgerða.