Skammdræg eldflaug frá Norður Kóreu hafnaði í Japanshafi

Norður Kóreumenn skutu í dag á loft skammdrægri eldflaug sem hafnaði í Japanshafi, að því er japanska fréttastofan NHK hefur eftir þarlendum yfirvöldum. Fréttirnar af eldflaugarskotinu þykja koma á viðkvæmum tíma, því helsti samningamaður Bandaríkjamanna í kjarnorkuviðræðunum við Norður Kóreu sagðist á sama tíma vera vongóður um að viðræðum um kjarnorkuafvopnun Norður Kóreu yrði haldið áfram í júlí.

Háttsett sendinefnd frá Alþjóða kjarnorkumálastofnuninni kemur til Norður Kóreu í næstu viku þar sem rætt verður við yfirvöld í Pyongyang um að hleypa eftirlitsmönnum frá stofnuninni inn í landið að nýju. Norður Kóreumenn höfðu heitið því að slökkva á kjarnakljúfi sínum í apríl en gengu á bak orða sinna. Þeir sögðust ekki ætla að virða loforðið fyrr en opnað yrði fyrir bankareikninga á i Macau sem innihalda 25 milljónir Bandaríkjadala. Nú hafa peningarnir verið sendir til Norður Kóreu og stjórnvöldum þar því ekkert að vanbúnaði að efna loforð sitt.