Nokkurra mánaða börnum bjargað frá barnaníðingum

Bresku lögreglunni hefur tekist að koma upp um barnaklámhring sem teygir anga sína til þrjátíu og fimm landa. Lögreglan bjargaði þrjátíu og einu barni úr klóm barnaníðinganna á meðan á rannsókn málsins stóð, sum þeirra voru aðeins nokkurra mánaða gömul.

Hópurinn notaði spjallaþráð á vefnum til að miðla sín á milli myndefni þar sem níðst var á börnum kynferðislega. Yfir sjö hundruð einstaklingar eru grunaðir um að tengjast málinu en rannsókn þess hefur staðið yfir í á ellefta mánuð. Tvö hundruð þeirra grunuðu eru Bretar. Breska lögreglan hefur handtekið tuttugu og sjö ára karlmann sem stóð á bak við síðuna og hefur hann viðurkennt að hafa bæði átt og dreift myndum tengdum barnaklámi. Lögreglan fann hátt í áttatíu þúsund slíkar ljósmyndir og yfir eitt þúsund myndbönd á tölvu hans.

Maðurinn var fyrst handtekin í september á síðasta ári og tókst lögreglunni í framhaldinu að safna upplýsingum um aðra meðlimi í gegnum spjallþráðinn. Alls bjargaði lögreglan þrjátíu og einu barni úr klóm barnaníðinga á meðan á rannsókn málsins stóð. Bandaríska sjónvarpsstöðin CBS greindi frá því að yngstu börnin hafi aðeins verið nokkurra mánaða.

Kynferðisbrotadeild lögreglunnar á höfuðborgarsvæðinu, sem rannsakar slík mál hér á landi, barst ekki beiðni um að aðstoða við rannsókn málsins og því ekki vitað til þess að neinn Íslendingur tengist málinu.