Ný ríkisstjórn Abbas hefur stuðning lykilaðila

Ný Neyðarstjórn Mahmoud Abbas forseta Palestínu hefur stuðning lykilaðila í alþjóðasamfélaginu. Bandaríkjastjórn og Evrópusambandið ætla að hefja fjárhagsaðstoð við stjórnvöld í Palestínu á nýjan leik eftir um eins og hálfs árs hlé.

Nýja stjórnin var mynduð í gær eftir að meðlimir Hamas náðu völdum á Gaza. Forystumenn Hamas neita að viðurkenna ríkisstjórnina og halda því framað Ismail Haiyeh sé enn réttkjörinn forsætisráðherra Palestínumanna.

Neyðarstjórnin hefur fengið góðar viðtökur hjá bæði Ísraelum og Bandaríkjamönnum sem fagna stjórninni og segja hana boða nýtt upphaf friðarumleitana.

Javier Solana, sem fer með utanríkismál Evrópusambandsins, tilkynnti í morgun að sambandið hygðist hefja beina aðstoð við bráðabirgðastjórn Mahmoud Abbas, forseta Palestínu, með fjárframlögum. Evrópusambandið hefur ekki stutt Palestínumenn fjárhagslega frá sigri Hamas í þingkosningum í janúar á síðasta ári. Óljóst er þó hvenær greiðslurnar taka að berast Palestínumönnum.

Condoleezza Rice, utanríkisráðherra Bandaríkjanna, tilkynnti svo um eftirmiðdag að bandarísk stjórnvöld ætluðu að gera slíkt hið sama og hefja fjárstuðning við palestínsk stjórnvöld á nýjan leik.

Ísraelar lokuðu í morgun fyrir vöruflutninga til Gaza og vilja ísraelsk stjórnvöld með aðgerðum sínum reyna að einangra meðlimi Hamas algjörlega. Fjölmargir íbúar á Gaza hafa reynt að flýja átökin og reynt að komast yfir til Ísraels í gegnum landamærastöð sem skilur að Ísrael og Gaza. Ísraelar hafa hins vegar verið fastir fyrir og neitað flestum um að fara í gegn og sent þá aftur til síns heima.