Íhuga að loka alþjóðlegu geimstöðinni tímabundið

Vísindamenn íhuga nú hvort loka eigi alþjóðlegu geimstöðinni tímabundið og flytja þrjá áhafnarmeðlimi hennar til jarðar í kjölfar alvarlegrar tölvubilunar. Tvær rússneskar tölvur sem stjórna súrefnisskömmtun og staðsetningarkerfi stöðvarinnar biluðu í nótt. Náist ekki að laga þær fljótlega mun súrefni geimstöðvarinnar klárast eftir 56 daga.

Rússneskir verkfræðingar sem hafa yfirumsjón með tölvunum hafa enn ekki fundið skýringu á biluninni. Á meðan hefur áhöfn geimstöðvarinnar neyðst til að handstýra stöðinni til að halda henni á réttum sporbaug og forðast árekstur við geimrusl.

Geimskutlan Atlantis eru nú við geimstöðina að sjá um viðhald og uppsetningu á sólarspeglum. Vísindamenn hjá bandarísku geimferðarstofnuninni, NASA, hafa velt þeim möguleika fyrir sér að lengja ferð geimskutlunnar á meðan reynt verður að gera við tölvurnar. Fá menn nú að minnsta kosti tvo daga til að komast til botns í biluninni en að öðrum kosti mun Atlantis þurfa flytja áhafnarmeðlimi stöðvarinnar til jarðar.