Svandís segir grímulausa stóriðjustefnu ríkja áfram

Á fundi stjórnar Orkuveitu Reykjavíkur í gær var samþykktur samningur um sölu á raforku til álvers í Helguvík. Svandís Svararsdóttir, fulltrúi Vinstri grænna í fyrirtækinu, greiddi atkvæði gegn samningnum og bókaði sérálit. Hún segir tillögu um samninginn óásættanlega.

„Orkuveita Reykjavíkur starfar samkvæmt hugmyndafræði sjálfbærrar þróunar sem allar á heildstæða nálgun hvers verkefnis sem ráðist er í," segir í bókun Svandísar. „Með því er átt við fyrir liggi með skýrum hætti hversu stórt álver er fyrirhugað að reisa, á hvaða svæði nákvæmlega er fyrirhugað að sækja orkuna, orkuverðið sé kunnugt almenningi og að fyrir liggi heildstæð áætlun um verkið og áhrif þess á umhverfi, samfélag og efnahag. Í ljósi þessa er fyrirliggjandi tillaga um afgreiðslu orkusölusamnings til hluta álvers í Helguvík óásættanleg."

Svandís segir að samningurinn sé hluti af ríkjandi stóriðjustefnu sem Vinstri græn hafi barist gegn um langa hríð. „Ekki verður séð að álbræðsla í Helguvík , með tilheyrandi mengun, náttúruspjöllum og efnahagsáhrifum sé brýnasta verkefni forríkrar þjóðar."

Borgarfulltrúinn bendir á að í málefnasamningi ríkisstjórnarinnar sem formaður stjórnar Orkuveitunnar, Guðlaugur Þór Þórðarson, á sæti í sé að finna fyrirheit um auknar áherslur í þágu umhverfis og náttúru. „Því hefði þess verið að vænta að við áform sem þessi yrðum við vör við einhvers konar áherslubreytingar stjórnvalda. Fulltrúi Vinstri grænna í stjórn Orkuveitu Reykjavíkur greiðir atkvæði gegn samningnum sem fyrir liggur á þem forsendum sem raktar eru hér."

Bókuninni lýkur svo á því að fulltrúinn lýsir „áhyggjum sínum yfir því að svo virðist sem grímulaus stóriðjustefna muni áfram ríkja í tíð nýrrar ríkisstjórnar, ekkert stopp."