Fram í heiðanna ró

Jörðin er að vakna til vorsins. Enn á ný fáum við að upplifa kraft vorsins, yndislegt! Þetta er gleðilegur árstími,náttúran skipar stóran sess og við ímyndum okkur spennandi ferðalög innanlands, gönguferðir og útilegur sumarsins. Það er einmitt á svona stundu þegar vetur konungur víkur til hliðar að við finnum hvað okkur þykir vænt um umhverfið. Hvað það er nú gott að náttúran skuli enn svara kallinu og vakna. Útlendingar elska Ísland. Ég var stödd erlendis fyrir stuttu í námsferð, sem er ekki í frásögur færandi nema hvað að alltaf þegar útlendingarnir uppgötvuðu að ég væri íslensk þá hreinlega supu þeir hveljur. Þeir lifnuðu allir við og dásömuðu landið mitt Ísland,sem þeir að vísu höfðu aldrei komið til!

En þeir voru svo sannfærðir um að þar væri allt svo fallegt og sérstakt.Þar væri hreint loft, falleg náttúra, stórkostlegar ár og enn fegurri fossar. Himininn heiður og blár. Þvílíkt land, Ísland! Ég fylltist auðvitað rammíslensku stolti. Samkvæmt þessu er -íslensk náttúra- vörumerkið okkar, hrein og tær!

Hvað með okkur? Ég vildi ekki eyðileggja þessar dásamlegu hugmyndir útlendinganna og hafði því ekki mörg orð um þá þróun sem er á Íslandi núna,þar sem íslensk stjórnvöld virðast ekki átta sig á gildi þess að varðveita hreina loftið og vilja drita niður álverum hingað og þangað. Ég vildi heldur ekki segja þeim allt sem liggur fyrir hér heima varðandi virkjanir og um eyðilegginguna eða náttúruspjöllin sem þeim fylgir. Ég vildi bara leyfa mér að njóta þess að hlusta á þetta fólk tala svona fallega um náttúru sem mér þykir sjálfri svo vænt um. Ég vildi bara trúa því að við Íslendingar erum frumleg og frábær þjóð, orginal og skynsöm sem lifum í takt við umhverfi okkar og af virðingu.

Ég vildi bara trúa því að við kynnum sjálf að meta þetta dásamlega land og nátturuleg gæði þess. Ég vildi bara trúa því að ný ríkisstjórn sem tæki við í vor væri meðvituð um stórkostlegan fjársjóð náttúru okkar og vildi varðveita landið áfram. Ég vildi bara trúa því að við ætlum að setja náttúruvernd í forgang í hvert sinn sem við framkvæmum.Við ætlum ekki að ryðja öllu um koll heldur að leyfa náttúrunni að teikna sig inn í hugmyndir okkar. Bláa lónið og umhverfi þess er td. gott dæmi um umhverfisvænan arkitektúr. Ég vildi bara trúa því að við Íslendingar ætlum ekki að halda áfram að flytja inn endalaust magn af verkamönnum til að byggja endalausar byggingar sem við höfum kannski svo ekkert að gera með. Ég vildi bara trúa því að við ætlum ekki endalaust að leyfa útlendingum að kaupa hræódýrt rafmagn af okkur og þar að auki setja upp loftmengandi verksmiðjur hér á landi. Nei, ég vildi telja mér trú um nýja tíma, upplýsta skynsama tíma í kjölfar kosninga. Já, svona er Íslandið mitt, frábært og kraftmikið land með frábærri þjóð, sem eitt sinn voru Víkingar og eru það kannski enn inn við beinið? Fram í heiðanna ró, þar er vistin mér góð, þar er himininn heiður og tær. Er ekki kominn tími til að staldra við, slaka á, anda og njóta þess sem við eigum nú þegar? Lifum heil!

Marta Eiríksdóttir, Kennari