Nicole Richie með of lágan blóðsykur

Nichole Richie er nú við tökur á nýrri seríu af raunveruleikaþættinum The Simple Life ásamt vinkonu sinni, hótelerfingjanum Paris Hilton. Nicole hefur undanfarin misseri verið talin eiga við átröskun að stríða en hún hefur ekki staðfest það við fjölmiðla.

Heilsa Nicole hefur ekki verið góð undanfarið. Í byrjun mánaðarins var hún lögð inn á spítala og í síðustu viku leið yfir hana á tökustað. Í gær tilkynnti síðan fjölmiðlafulltrúi hennar að hún væri með of lágan blóðsykur. Það væri ástæða heilsubrestsins.

Þetta er þó ekki öll sagan því samkvæmt heimildum People er Nicole sögð hafa nokkrum sinnum næstum fallið í yfirlið á tökustað og að hún þurfi að dvelja inni í hjólhýsi sínu dágóðan hluta úr degi hverjum. Það er því vonandi að Nicole fái hjálp sem fyrst þar sem ljóst er hvað hrjáir hana.