Gerrard: Erfiðasti leikur okkar til þessa

Steven Gerrard, fyrirliði Liverpool, segir að síðari leikurinn við Barcelona í 16-liða úrslitum Meistaradeildarinnar annað kvöld verði erfiðasta verkefni liðsins til þessa í keppninni. Hann segir að leikurinn verði erfiðari en úrslitaleikurinn gegn Milan í Istanbul fyrir tveimur árum.

Liverpool fer inn í leikinn á heimavelli annað kvöld með 2-1 forystu á bakinu úr fyrri leiknum í Barcelona. Leikurinn verður sýndur beint á Sýn annað kvöld klukkan 19:30 og er hér á ferðinni einn af leikjum ársins. Steven Gerrard er a.m.k. á þeirri skoðun.

"Þetta verður erfiðasta verkefni okkar til þessa í Meistaradeildinni. Barcelona vann keppnina í fyrra og þó við höfum staðið okkur vel núna - er Barcelona eins gott lið og maður getur spilað við í heiminum. Þetta verður erfiðari leikur en úrslitaleikurinn við Milan í Istanbul.

Ég er búinn að horfa mikið á Barcelona í sjónvarpinu í vetur og ég sá til að mynda leik þeirra við Sevilla um helgina. Þó þeir hafi tapað þeim leik, þýðir ekkert að trúa því að þetta lið sé í vandræðum. Barcelona á yfirleitt nokkra kafla í hverjum leik þar sem þeir ráða gjörsamlega ferðinni og því verðum við sannarlega að vera tilbúnir.

Menn mega ekki gleyma því að við erum úr leik á nánast öllum vígstöðvum nema í Evrópukeppninni og liðið er með stórt hjarta eins og það sýndi í Barcelona í fyrri leiknum. Leikirnir verða ekki stærri en þessi og við höfum allt að vinna. Það væri sjálfsmorð fyrir okkur að fara of roggnir í þennan leik, en við höfum unnið þessa keppni áður og munum tjalda öllu til að gera það aftur," sagði Gerrard.