Helmingslíkur á að Henry verði með

Arsene Wenger segir helmingslíkur á því að Thierry Henry komi við sögu í síðari leik Arsenal og PSV Eindhoven í 16-liða úrslitum Meistaradeildarinnar á miðvikudagskvöldið. Henry á við erfið meiðsli að stríða og gerði þáttaka hans í fyrri leiknum lítið til að laga þau.

Henry hefur fengið verkjalyf fyrir þá leiki sem hann hefur spilað og gerði það illt verra fyrir bata hans að mati knattspyrnustjórans. Emmanuel Adebayor verður leikfær á miðvikudagskvöldið þar sem leikbann hans á Englandi nær ekki yfir Meistaradeildina.

"Það eru helmingslíkur á því að Henry verði með gegn PSV, en við tökum ekki ákvörðun um það fyrr en hann fer í allra síðustu læknisskoðun fyrir leikinn. Við tökum áhættu með því að hafa hann í 18-manna hóp fyrir leikinn, en ég er ekki búinn að ákveða hvort hann verður þá í byrjunarliði eða ekki," sagði Wenger.