Byrgismál sagt sitja á hakanum vegna þráhyggju ráðherra

„Er ekki mál að linni," sagði Þorgerður Katrín Gunnarsdóttir menntamálaráðherra þegar Valdimar Leó Friðriksson vakti athygli á yfirlýsingu BSRB og BHM um að efasemdir væru um að starfsmönnum RÚV yrði tryggð sömu kjör og réttindi eftir hlutfélagavæðingu RÚV. Þá kvörtuðu stjórnarandstöðuþingmenn yfir því fundi Alþingis hefði ekki verið frestað í dag svo að betur mætti fara yfir mál Byrgisins í fjárlaganefnd.

Lúðvík Bergvinsson, þingmaður Samfylkingarinnar, benti á að fjárlaganefnd hefði fengið ríkisendurskoðanda á fund sinn klukkan hálfníu í morgun og þá hefði einnig átt að ræða við fulltrúa félagsmála- og fjármálaráðuneytis. Byrgismálið væri hins vegar svo stórt að aðeins hefði verið rætt við ríkisendurskoðanda en ekki gefist tími til að ræða við hina vegna þess að fundur var ákveðinn á Alþingi klukkan hálfellefu. Ósk um að fresta þeim fundi hefði verið hafnað og það væri vegna þráhyggju menntamálaráðherra við að koma frumvarpinu um RÚV í gegn.

Menntamálaráðherra sagði hins vegar umhugsunarvert að stjórnarandstaðan hefði eytt meiri tíma í umræður um RÚV-frumvarpið en Kárahnjúka og EES-samninginn. Vildi hún ganga sem fyrst til atkvæðagreiðslu um frumvarpið. Sagðist hún jafnframt myndu svara spurningum um réttindi starfsmanna RÚV í þriðju umræðu um málið í dag.

Fjórða daginn í röð var tekist á um þingstörfin og áhrif RÚV-frumvarpsins á þau. Þar sökuðu stjórnarandstæðingar ráðherra um þráhyggju í málinu en stjórnarliðar sökuðu stjórnarandstæðinga um að bera sjálfir ábyrgð á því að önnur mál væru ekki rædd með málþófi um RÚV-frumvarpið. Því er enn stál í stál hjá stjórn og stjórnarandstöðu á þingi.