Tilbúinn í stríð við flokksbróður vegna Suðurlandsvegar

Kjartan Ólafsson, þingmaður Sjálfstæðisflokksins í Suðurkjördæmi og samflokksmaður Sturlu Böðvarssonar samgönguráðherra, segist tilbúinn í stríð við samgönguráðherra verði vegurinn á milli Selfoss og Reykjavíkur ekki tvöfaldaður og aðgreindur í náinni framtíð.

Fram kemur í Sunnlenska fréttablaðinu í dag að samgönguráðherra muni á næstunni leggja fram vegaáætlun á þingi til næstu tólf ára og þá muni skýrast hvernig staðið verði að vegabótum á Suðurlandsvegi.

Segist Kjartan ekki munu sætta sig við loðin svör frá samgönguráðherra og að í hans huga komi ekkert annað til greina en tvöföldun vegarins. Kjartan segist munu gera allt sem hann geti til þess að gengið verði frá málinu fyrir kosningar í vor.

Í Sunnlenska segir enn fremur að stjórnendur sveitarfélaga Ölfuss, Árborgar og Hveragerðis leggist algerlega gegn hugmyndum Vegagerðarinnar um svokallaðan 2+1 veg.