Leysa Johnston úr haldi í dag

Hamasliðar tilkynntu í morgun að breski fréttamaður BBC, Alan Johnston, yrði leystur úr haldi mannræningja seinna í dag. Nú eru þrír mánuðir síðan fréttamanninum var rænt á Gasa af öfgahóp sem kallar sig Her Islams. Í byrjun mánaðarins sendu þeir út myndband þar sem Alan sagðist vera við góða heilsu og að vel væri farið með hann.

Á blaðamannafundi í morgun sagði fulltrúi Hamas að samtökin hefðu lagt mikla áherslu á að semja um lausn fréttamannsins. Johnston var eini vestræni fréttaritarinn með fasta búsetu á Gasa.