Önnur umferð frönsku þingkosninganna í dag

Kjörstaðir opnuðu í Frakklandi í morgun í annarri umferð þingkosninga. Nicolas Sarkozy forseti vonast til að hægri flokkur hans vinni meirihluta í kosningunum. Stuðningsmenn hans segja það forsendu þess að hann geti hrint umbótaáætlun sinni í framkvæmd.

Skoðanakannanir á föstudag sýndu að flokkur forsetans fengi meira en fjögur hundruð sæti af þeim fimm hundruð sjötíu og sjö sem eru á þjóðþinginu. Sósíalistar óttast að mikill sigur hægrimanna gæti þaggað niður í lýðræðisöflum í landinu og komið óþægilegum umbótum á.