Segjast hafa sannanir fyrir því að Íranir útvegi Talibönum vopn

Bandaríkjamenn segjast hafa óyggjandi sannanir fyrir því að Íranar útvegi Talíbönum í Afganistan vopn í baráttunni við herlið Afgana og Atlantshafsbandalagsins. Viðbrögð annarra þjóða eru varfærin við þeim fréttum en Bandaríkjamenn hafa áður lagt fram óyggjandi sannanir á alþjóða vettvangi.

Það var í febrúar 2003 sem Colin Powell, þáverandi utanríkisráðherra Bandaríkjanna, kom fyrir Öryggisráð Sameinuðu þjóðanna til að færa rök fyrir innrás í Írak. Hann sagði engan vafa á því að Saddam Hússein, þáverandi Íraksforseti, hefði yfir efnavopnum að ráða og gæti framleitt fleiri. Hann sagði einnig engan vafa á því í sínum huga að Saddam reyndi hvað sem hann gæti til að verða sér úti um efni til að framleiða kjarnorkuvopn.

Ráðist var inn í Írak rúmum mánuði síðar.

Eftir fall Saddams fundust engin efnavopn í Írak og ekkert sem benti til kjarnorkuvopnasmíði. Powell sagði 2005 að ræðan væri svartur blettur á ferli sínum.

Nú segja bandarísk stjórnvöld óyggjandi sannanir fyrir því að vopn frá Íran hafi ratað í hendur Talíbana í Afganistan.

Þetta endurtók Nicholas Burns, aðstoðar utanríkisráðherra Bandaríkjanna, á blaðamannfundi í Reykjavík í gær.