Kosið í Tyrklandi

Tyrkir ganga til þingkosninga í dag, en kjörklefar opnuðu snemma í morgun. Úrslit kosninganna þykja afar mikilvæg í átökum milli veraldlega sinnaðra Tyrkja sem styðja aðskilnað ríkis og íslam, og trúaðra múslima.

Kosningum var flýtt vegna þess að þingið komst ekki að samkomulagi um val á frambjóðendum til forseta. Veraldlega sinnaðir þingflokkar og hinn valdamikli her hindruðu framboð heittrúaðs múslims úr röðum AK flokksins og héldu því fram að veraldarhyggja væri í hættu í landinu. Ahmed Sezer forseti sem kosinn var í embættið árið 2000 er afar verldlega sinnaður.

Kosningabaráttan hefur farið friðsamlega fram síðustu þrjá mánuði. Nýrri ríkisstjórn bíða afar krefjandi verkefni, kosning nýs forseta, ofbeldi kúrdískra uppreisnarmanna og klofning milli fylkinga með og á móti þeim tökum sem islam hefur á tyrkneskt samfélag.

Tyrkir hafa náð miklum framförum á efnahags- og stjórnmálasviðum eftir ófarir síðustu áratuga, en sumir óttast að úrslit kosninganna muni auka enn á bil ólíkra hópa í landinu þar sem um 73 milljónir búa, flestir múslimar.

Um 42 milljón manns hafa kosningarétt. 14 flokkar og berjast um þingsætin 550, en flokkarnir þurfa að minnsta kosti tíu prósent fylgi til að fá sæti á þingi. Í síðustu kosningum árið 2002 var það AKP flokkur Recep Erdogan forsætisráðherra landsins sem varð hlutskarpastur, með 34 prósent atkvæða. Kannanir spá flokknum auknu fylgi í kosningunum í dag.

Þjóðernisflokknum er spáð 14 prósenta fylgi, en þeir eru á móti aðild Tyrkja að Evrópusambandinu. Fjöldi Kúrda býður sig fram sem óháða þingmenn, en markmið þeirra er að bæta aðstæður Kúrda sem telja um þrettán milljónir og er bannað að nota eigið tungumál.

Samkvæmt tyrkneskum lögum ber öllum á kjörskrá að kjósa og er þess vegna búist við að kjörsókn verði afar mikil.