Tyrkneski herinn varar við uppgangi öfgafullra múslima

Yfirmaður tyrkneska hersins varaði í dag við því að ill öfl í landinu væru að grafa undan tyrkneska ríkinu. Hershöfðinginn, Yasar Buyukanit sagði þetta í yfirlýsingu sem hann sendi frá sér í dag. Hann tilgreindi ekki hvaða öfl hann ætti við en á morgun er búist við því að þingmenn á tyrkneska þinginu kjósi Abdullah Gul sem forseta landsins. Gul er fyrrverandi íslamisti.

Framboð Gul hefur valdið miklum deilum í landinu en herinn lítur á það sem skyldu sína að standa vörð um aðskilnað trúar og stjórnmála í landinu. Síðastliðin 60 ár hefur herinn steypt fjórum ríkisstjórnum af stóli.

Það er ekki síst fyrir andstöðu hersins sem Gul hefur mistekist að ná kjöri sem forseti í landinu í fyrstu tveimur umferðum kosninganna. Hann er frambjóðandi AK flokksins, sem er með meirihluta á þinginu og fastlega er búist við því að hann sigri þriðju umferð kosninganna sem fram fer á morgun.

Yfirmenn hersins eru mjög tortryggir í garð Guls, en hann er trúrækinn múslími og hafa þeir hann grunaðann um að vilja gera Tyrkland að íslömsku ríki. Gul hefur þvertekið fyrir að þetta sé ætlun hans og hefur hann lýst því yfir að hann muni standa vörð um aðskilnað trúar og stjórnmála í landinu nái hann kjöri.