Hafa hert rannsókn sína á upptökum skógarelda

Yfirvöld í Grikklandi hafa hert rannsókn sína á upptökum skógarelda sem geisað hafa þar í landi síðan á föstudag. Að minnsta kosti sextíu manns hafa látið lífið í eldunum.

Björgunarsveitarmenn hafa unnið hörðum höndum að því að bjarga þorpsbúum sem orðið hafa innlyksa vegna eldanna. Íbúarnir hafa margir hverjir fyllst skelfingu og óttast það versta þar sem björgunarsveitarmenn hafa oft átt erfitt með að komast að svæðunum sökum eldanna.

Þúsundir hafa þurft að flýja heimili sín en neyðarástandi hefur verið lýst yfir í landinu. Slökkviliðsmönnum tókst í nótt að forða fornu borginni Ólympíu frá því að verða eldinum á bráð.

Yfirvöld hafa hert rannsókn sína á upptökum eldanna og hafa heitið allt að nítíu milljónum íslenskra króna fyrir upplýsingar sem leitt gætu til handtöku þeirra sem ábyrgð bera á eldunum. Svo virðist sem rekja megi upphaf eldanna til íkveikju og að kveikt hafi verið í á fleiri einum stað.

Sérstök sveit lögreglumanna, sem berst gegn hryðjuverkum, hefur fengið það hlutverk að yfirheyra þrjátíu og tvo einstaklinga sem handteknir hafa verið grunaðir um að tengjast málinu.

Talið er að eldar logi í um helmingi landsins og fylgjast óttaslegnir íbúarnir með sjónvarpsfréttum af björgunaraðgerðum. Margir treysta á að fá upplýsingar um gegnum fjölmiðla um hvort hjálp berist þeim á næstunni eða hvort eldarnir séu að breiðast út í átt að heimilum þeirra.

Íbúar Grikklands eru margir reiðir yfirvöldum fyrir að hafa ekki gert nóg til að tryggja öryggi þeirra. Yfirvöld segjast vera að reyna að gera hvað sem þau geti til að ná tökum á eldunum.