Nýr milljarða fjárfestingasjóður

Nýr fjárfestingasjóður sem er í meirihlutaeigu lífeyrissjóða hefur lokið fjármögnun sinni og hefur nú 5,5 milljarða til að fjárfesta í sprotafyrirtækjum. Ísland er annað vænlegasta landið fyrir fjárfesta í Evrópu samkvæmt nýrri könnun.

Fjárfestingasjóðurinn heitir Brú II og eiga helstu lífeyrissjóðir landsins um 60 prósent í sjóðnum en aðrir fjárfestar í sjóðnum eru Straumur Burðarás, Tryggingamiðstöðin og Saxhóll. Brú mun sérhæfa sig í að fjármagna fyrirtæki við upphaf hraðvaxtaskeiðs þeirra og selur síðan hlut sinn í þeim þegar vaxtaskeiðinu lýkur Hann verður stærsti fjárfestingasjóðrinn á sínu sviði. Forsætisráðherra ávarpaði forráðamenn fyrirtækisns og fjárfesta í dag og greindi frá nýrri könnun Evrópusamtaka einka- og áhættufjárfesta.

"Þessir aðilar hafa metið skatta- og lagaumhverfi í tuttugu og einu Evrópulandi með hliðsjón af því hvar væri vænlegast að fjárfesta," sagði Geir H Haarde forsætisráðherra. Samkvæmt þessu mati fylgi Ísland fast á hæla Bretlands og sé í öðru sæti Evrópulanda þar sem vænlegast sé fyrir einka- og áhættufjárfesta að fjárfesta.

Eins og áður sagði eru nokkrir öflugustu lífeyrissjóðir landsins með um 60 prósent í sjóðnum eða rúma þrjá milljarða. Það er því spurning hvort verið sé að leika sér með fjármuni lífeyrissjóðanna.

Gísli Hjálmtýsson framkvæmdastjóri Brúar II segir að öllum fjárfestingum fylgi áhætta. "Ég held að við séum ekki að leika okkur með peningana. Staðreyndin er sú að það er fátt sem lífeyrissjóðir landsins hafa hagnast meira á en ný fyrirtæki sem stofnuð hafa verið á Íslandi á síðustu árum. Við munum halda því áfram og þeir munu hagnast mjög vel á því," sagði Gísli.