Bandaríkjamenn handtaka íranska sendinefnd í Bagdad

Bandarískir hermenn í Bagdad handtóku í dag sjö Írana sem tilheyra sendinefnd sem var í borginni til þess að skrifa undir samning um sölu á raforku, að því er ríkisútvarp Írans greinir frá.

Fréttastofa BBC greinir frá því að íranska sendiráðið í Bagdad hafi þegar haft samband við utanríkisráðuneyti landsins og að formleg kvörtun verði lögð fram í fyrramálið. Hópurinn var handtekinn á Sheraton hótelinu í Bagdad og voru þeir leiddir út í herjeppa Bandaríkjahers með bundið fyrir augu og handjárnaðir.

Handtaka hópsins kemur í kjölfar ræðu George Bush þar sem hann gagnrýndi írönsk stjórnvöld harðlega fyrir að skipta sér af málefnum Íraka.

Bandaríkjamenn hafa haft fimm Írana í haldi síðan í janúar. Mennirnir eru sagðir tengjast Byltingavörðum Íranshers og að þeir hafi verið í Írak til þess að aðstoða uppreisnarmenn í baráttu sinni við hernámsliðið. Íranar halda því hins vegar fram að mennirnir séu diplómatar og hafa þeir krafist þess að þeim verði sleppt tafarlaust.