Missa svefn yfir græjunum

Breskir unglingar eru að missa svefn vegna allra raftækjanna í svefnherberginu þeirra, og skemma þar með heilsu sína. Þrjátíu prósent unglinga á aldrinum 12-16 ára fá einungis 4 til 7 tíma svefn, í stað 8 eða 9 eins og mælt er með.

Þetta kemur fram í könnun breskra samtakanna ,,The Sleep Council" .

Þúsund unglingar svöruðu könnuninni og sögðust nær allir þeirra vera með síma, hljómflutningstæki eða sjónvarp í herberginu sínu. Tveir þriðju þeirra sögðust vera með alla þessa hluti. Þrír fimmtu drengja sögðust auk allra þessara hluta vera með leikjatölvu í herberginu.

Fjórðungur unglinganna sögðust sofna út frá sjónvarpi, með tónlist í eyrunum eða með önnur tæki í gangi oftar en einu sinni í viku.

Samtökin segja þetta mikið áhyggjuefni, enda sé svefn mikilvægur fyrir andlega og líkamlega heilsu.