Abdullah Gul nýr forseti Tyrklands

Tyrkneska þingið kaus rétt í þessu fyrrverandi íslamistann Abdullah Gul sem forseta landsins.

Gul hefur undanfarin ár gegnt embætti utanríkisráðherra fyrir AK flokkinn. Frá árinu 2002, þegar AK flokkurinn komst til valda, hefur hann sannað sig sem öflugan diplómat og meðal annars verið í fararbroddi í viðræðum um inngöngu Tyrklands í Evrópusambandið.

Frá stofnun tyrkneska lýðveldisins hefur ríkt algjör aðskilnaður ríkis og mosku. Her landsins lítur á það sem skyldu sína að standa vörð um þennan aðskilnað og hefur undanfarin 60 ár steypt fjórum ríkisstjórnum af stóli þess vegna.

Og herinn er síður en svo hrifinn af Gul, sem hann grunar um að vilja auka veg Islams í tyrkeneskum stjórnmálum. Í yfirlýsingu í gær sagði yfirmaður hersins að ill öfl væru að reyna að grafa undan ríkinu, og er fastlega búist við að hann eigi þar við Gul.

Gul hefur þvertekið fyrir að hafa nokkuð illt í hyggju og hefur hann lýst því yfir að hann muni sem forseti standa vörð um aðskilnað trúar og stjórnmála í landinu.