Trúmaður í forsetastól í Tyrklandi í dag

Fastlega er gert ráð fyrir því að Abdulla Gul verði kjörinn forseti Tyrklands, í atkvæðagreiðslu í þinginu upp úr hádegi í dag.

Tyrkland hefur verið á mörkum austurs og vesturs í landfræðilegum og sögulegum skilningi síðustu tvö þúsund árin eða meir. Þar sem áður voru grísk hof og höfuðkirkjur eru nú moskur.

En frá því tyrkneska lýðveldið var stofnað upp úr fyrra stríði hefur algjör aðskilnaður ríkis og mosku verið meginstef í tyrknesku þjóðlífi. Konur hafa verið lattar mjög til að bera slæður og er reyndar bannað að vera með slæður í opinberum byggingum.

Tyrkneski herinn hefur litið á sig sem útvörð þessarar stefnu - og því er það herinn sem allra augu beinast að, nú þegar trúmaður sest á forsetastól. Kona Abdulla Gul ber slæðu, sem til dæmis hefur ekki verið gert í forsetahöllinni, þar sem hún mun eiga heima.

Gul segir enga ástæðu til að óttast að hann muni grafa undan aðskilnaði ríkis og mosku, þó að hann hafi fyrr á árum tilheyrt hreyfingu íslamista í landinu.

Herforingjar hafa fjórum sinnum á síðustu hálfri öld velt ríkisstjórnum sem þeim hefur ekki líkað við - og þeir segja nú að herinn muni áfram standa vörð um þá stefnu að blanda ekki saman trúmálum og stjórnmálum í Tyrklandi.