Vill herinn ekki heim strax

Gordon Brown, forsætisráðherra Bretlands, vill ekki setja nein tímamörk á veru breska hersins í Írak. Í bréfi til Sir Menzies Campbells, leiðtoga Frjálslynda demókrataflokksins, sagði Brown að herinn hefði enn skyldum að gegna í Írak, og því óviðeigandi að ákveða brottfarardaginn.

Í bréfinu, sem var gert opinbert fyrir skömmu, sagði Brown að það væri ekki rétt að herinn gæti litlu áorkað í Írak. Þá sagði hann að herinn myndi halda áfram að vinna með írökskum yfirvöldum með það að markmiði að þau gætu tekið yfir öryggisgæslu í landinu.

Campbell hafði gagnrýnt áframhaldandi veru hersins í Írak og Afganistan, þar sem fjöldi dauðsfalla þar væri óásættanlegur.

Yfirhershöfðingi breska hersins, Sir Richard Dannatt, hefur samsinnt Brown. Hann sagði í ræðu í júní að Bretar þyrftu að undirbúa sig undir kynslóð af átökum, og að ekki mætti yfirgefa Írak fyrr en einhver árangur hefði náðst þar.