Motion Boys hitar upp fyrir The Rapture

Íslenska rafpoppsveitin Motion Boys mun hita upp á hljómleikum danspönkararanna The Rapture á NASA við Austurvöll þann 26. júní.

Motion Boys hafa vakið mikla athygli undanfarið, ekki síst í krafti lagsins „Hold me closer to your heart". Sveitin hefur aðeins sent frá sér tvö lög til þessa (hið fyrra, „Waiting to happen" naut einnig mikillar hylli fyrr í vetur), en gagnrýnendur, poppspekingar og tónlistarunnendur bíða fyrstu breiðskífu þeirra af mikilli eftirvæntingu.

Motion Boys er samstarfsverkefni þeirra Árna „PlúsEins" Rúnarssonar (Hairdoctor, FM Belfast) og Birgis Ísleifs Gunnarssonar (Byltan), en sér til fylgilags á tónleikum hafa þeir einvalalið íslenskra tónlistarmanna. Má þar nefna Trabant-mennina Vidda og Gísla Galdur, Bjössa úr Mínus og Tobba, fyrrverandi Jeff Who? liða. Motion Boys leika dansvænt rafpopp eins og það gerist best og ástunda jafnframt æsilega sviðsframkomu; víst má telja að þeim takist að hita gesti NASA að suðumarki áður en The Rapture stíga á svið.

Enn ertu til miðar á tónleikana og fer miðasala fram í verslunum Skífunnar, völdum verslunum BT og á Midi.is. Miðaverð er 3.900 krónur.