Börnum nauðgað í beinni útsendingu

Lögreglan í Kanada, Ástralíu og Bandaríkjunum aðstoðaði lögregluna í Bretlandi við að uppræta umfangsmikill alþjóðlegan barnaklámhring. Hópurinn notaði netið til að dreifa barnaklámi en á síðunni mátti sjá börnum nauðgað í beinni útsendingu.

Tilkynnt var í gær að bresku lögreglunni hefði tekist að koma upp um barnaklámhring sem teygði anga sína til þrjátíu og fimm landa. Um mjög umfangsmiklar aðgerðir var að ræða og naut lögreglan aðstoðar starfsbræðra sinna í Kanada, Ástralíu og Bandaríkjunum. Hringurinn notaði spjallaþráð á vefnum til að miðla sín á milli myndefni þar sem níðst var á kynferðislega börnum.

Kanadíska lögreglan komst á snoðir um barnaklámhringinn vorið 2005 en um ári síðar eða í ágúst 2006 hafði hún samband við bresku lögregluna vegna gruns um að síðunni væri haldið úti þar í landi. Breska lögreglan handtók svo í september í fyrra upphafsmann síðunnar, tuttugu og sjö ára karlmann, sem hefur viðurkennt að hafa bæði átt og dreift myndum tengdum barnaklámi.

Lögreglan fann hátt í áttatíu þúsund ljósmyndir og yfir eitt þúsund myndbönd tengdum barnaklámi á tölvu hans. Á síðunni mátti meðal annars sjá börnum nauðgað í beinni útsendingu

Í framhaldinu af handtöku mannsins notuðu rannsóknarlögreglumenn síðuna til að ná sambandi við aðra barnaníðinga og safna um þá upplýsingum sem leitt gætu til handtöku þeirra.

Alls bjargaði lögreglan þrjátíu og einu barni úr klóm barnaníðinga á meðan á rannsókn málsins stóð, þau yngstu voru aðeins nokkurra mánaða. Talið er að yfir sjö hundruð einstaklingar tengist málinu.