Þurftum enga presta eða sálfræðinga

Logi Ólafsson þjálfari KR sagðist vera sáttur við að hafa náð að klára verkefnið sem honum var sett fyrir þegar hann tók við liðinu seint í sumar - að halda stórveldinu í efstu deild. 

"Ég er mjög ánægður með að það hafi tekist að halda liðinu í deildinni, en það er það markmið sem sett var þegar ég tók við liðinu. Þetta leit um tíma ekkert sérlega vel út en menn ákváðu að taka þetta föstum tökum og það hafðist. Þetta var auðvitað erfitt á móti Val og FH en niðurstaðan þar fyrir utan er þrjú jafntefli og tveir sigrar ef ég man rétt. Það verður að teljast bærilegt.

Hér komu engir prestar eða sálfræðingar að málum heldur ákváðum við bara að rífa okkur upp úr þessu og strákarnir og þeir eiga heiður skilinn fyrir það - Menn eins og Rúnar Kristinsson sem er hér væntanlega að leika sinn síðasta knattspyrnuleik og leggur hér upp mark í dag.

Ég get ekki svarað neinu um það í augnablikinu hvert framhaldið verður hjá mér í KR. Það var ákveðið með mjög skömmum fyrirvara að ég tæki þetta verkefni að mér og ég get því ekkert sagt um það á þessari stundu hvort er vilji hjá mér eða þeim að halda áfram með liðið," sagði Logi í samtali við Vísi í dag.