Ummæli Valsmanna eftir sigurinn

Willum Þór Þórsson þjálfari Vals var að vonum kampakátur eftir að hans menn hömpuðu Íslandsmeistaratitlinum í dag. Það voru þeir Helgi Sigurðsson og Guðmundur Benediktsson einnig.

"Þetta er einstakt lið og þetta er frábær sigur fyrir liðið. Það kom mér ekkert á óvart að HK-menn yrðu erfiðir. Þetta tók á taugarnar í dag hjá okkur en hafðist að lokum. Þetta er búið að vera dálítið svekkelsi hjá okkur síðustu tvö árin og því er þetta rosalega sætt núna. Mig langar bara að koma fram þakklæti til allra sem lögðu hönd á plóginn með okkur," sagði Willum.

Ég er ánægðastur með samstöðuna í þessum hóp hjá okkur og við erum með einstakt lið í höndunum á okkur. Okkur tókst að leggja FH í báðum leikjunum í sumar og það sýnir okkur að við áttum þetta skilið," sagði Willum Þórsson, þjálfari Vals eftir sigur hans manna í dag.



"Það er frábær karakter í þessu liði og vissum allan tímann að við værum með besta liðið. Ég kom hingað til að verða Íslandsmeistari, það hefur heldur betur gengið eftir og við erum hrikalega ánægðir," sagði Helgi Sigurðsson markahrókur.

"Þeir eru allir sætir, en maður gerir ekki upp á milli barnanna sinna," sagði Guðmundur Benediktsson, sem einnig varð meistari með KR á sínum tíma. "Þetta er ástæðan fyrir því að ég er í Val. Við ætlum bara að skemmta okkur og njóta sigursins núna," sagði Guðmundur í samtali við Sýn og gaf ekkert upp um framtíðaráform sín þegar hann var spurður að því hvort hann ætlaði að hætta.