Jónas Grani og Höskuldur í FH

Jónas Grani Garðarsson, markakóngur Landsbankadeildarinnar, er á leið til FH á nýjan leik. Þetta kemur fram á Fótbolti.net. Jónas skoraði þrettán mörk í átján leikjum fyrir Fram í deildinni í sumar.

Jónas er 34 ára en hann lék með FH 1998-2006. Í fyrra gekk hann í raðir Fram og fór með liðinu upp í Landsbankadeildina. Hann lék síðan hreint frábærlega fyrir Safamýrarliðið í sumar.

Hann hefur nú ákveðið að snúa aftur í Hafnarfjörðinn.

Þá hefur FH fengið bakvörðinn Höskuld Eiríksson úr Víking en hann hefur skrifað undir tveggja ára samning við bikarmeistarana. Víkingur féll úr Landsbankadeildinni á nýliðnu tímabili.

Heimir Guðjónsson, nýráðinn aðalþjálfari FH, hefur haft í nægu að snúast og er að mynda leikmannahóp sinn fyrir næsta tímabil.