Spilar fyrir vinkonu sína

„Hún er alin upp í Eyjum og það hefur alltaf mikil áhrif,“ segir Guðmunda Bjarnadóttir, móðir Margrétar Láru Viðarsdóttur, framherja íslenska kvennalandsliðsins í knattspyrnu. Margrét Lára hefur farið mikinn í íslenskri kvennaknattspyrnu undanfarin ár og nú er svo komið að þessi 21 árs gamla knattspyrnukona er orðin markahæsti leikmaður liðsins frá upphafi.

„Hún er alin upp í stórum systkinahópi við Strembugötu sem er rétt hjá knattspyrnuvellinum og því var alltaf stutt út á völlinn,“ bætir Guðmunda við en Margrét lék oft á tíðum knattspyrnu við eldri bræður sína. Og fékk lítið af sénsum út á það að vera „litla systir“. „Þeir gáfu henni aldrei neitt auka enda var hún líka svo leikin að hún lék oftast á þá,“ segir Guðmunda og hlær.

Á sumrin stóð síðan Margrét Lára við færibandið hjá fiskvinnslufyrirtæki fjölskyldunnar og flakaði fisk. „Hún gekk eiginlega í öll störf,“ segir Guðmunda og hún segir dóttur sína hafa verið í öllum íþróttum, bæði frjálsum og handbolta auk knattspyrnunnar. Faðir hennar, Viðar Elíasson, þótti liðtækur leikmaður á árum áður og því snerist allt heimilishaldið eiginlega um fótbolta og aftur fótbolta. „Hún hefur eiginlega alltaf verið með boltann á tánum frá því hún byrjaði að ganga og kannski fyrr,“ segir Guðmunda sem fylgdi Margréti á nánast alla leiki og öll mót sem hún tók þátt í.

Og þrátt fyrir að kvennaknattspyrna hafi farið halloka í umfjöllun og fjáraustri undanfarin ár þá dylst engum hverjar það eru sem halda merki íslenskrar knattspyrnu á lofti. „Þetta er náttúrulega alveg frábær hópur og þessi stóri sigur gegn Serbum kom alveg skemmtilega á óvart,“ segir Guðmunda sem var að sjálfsögðu á vellinum.

Margrét Lára hefur spilað með öllum yngri landsliðunum og segir Guðmunda að það hafi alltaf verið markmið hennar að komast í A-landsliðið. Æskuvinkona hennar, Karítas Þórarinsdóttir, lék með henni í gegnum öll árin en hún meiddist síðan illa og varð að láta af knattspyrnuiðkuninni. Guðmunda segir það hafa verið töluvert áfall fyrir hana og Margrét Lára tekur undir það. „Karítas er sú eina sem sendir mér alltaf sms fyrir leiki og óskar mér góðs gengis. Það var mjög erfitt að missa hana úr knattspyrnunni og kannski má segja að ég sé alltaf að spila svolítið fyrir hana.“