Vildu ekki aðra Díönu

Ákvörðun Vilhjálms Bretaprins að hætta með kærustu sinni til fimm ára, Kate Middleton, var tekin á leynilegum fundi hjá konungsfjölskyldunni.

Breska blaðið News of the World greinir frá þessu og segir að Elísabet drottning hafi við þetta tækifæri sagt Vilhjálmi að binda enda á sambandið. „Ekki flýta þér upp að altarinu - við viljum ekki aðra Díönu,“ sagði drottningin á fundinum.Vilhjálmur tilkynnti fjölskyldu sinni að hann væri ekki tilbúinn að ganga í hjónaband að svo komnu máli, hann vildi einbeita sér að ferli sínum innan hersins.

Á fyrrnefndum fundi voru flestir meðlimir konungsfjölskyldunnar sammála um að eftir fimm ára samband ættu þau Vilhjálmur og Kate að vera viss um hvert sambandið stefndi. Fyrst prinsinn hefði efasemdir sem þessar væri best að binda strax endi á sambandið. „Þú getur gekki verið með hana í eftirdragi að eilífu,“ sagði Filippus drottningarmaður við þetta tækifæri.