Morðingjar Rhys Jones náðust á mynd

Lögreglan í Liverpool segist hafa upptökur úr öryggismyndavélum af þeim sem myrtu hinn 11 ára gamla Rhys Jones. Þetta var upplýst eftir að sjö ungmenni voru handtekin í gær. Þar af eru tvær stúlkur úr Croxteth og Norris Green hverfunum í norðurhluta Liverpool, þar sem drengurinn var skotinn. Ungmennin eru á aldrinum 15-19 ára. Tveir piltar sem voru handteknir í síðustu viku hafa verið látnir lausir gegn tryggingu.

Kona sem lögreglan í Bretlandi telur að geti verið lykilvitni vegna morðsins á Rhys Jones er búin að gefa sig fram. Samkvæmt Sky fréttastöðinni var konan nærstödd þegar morðið var framið og er vonast til þess að hún geti gefið upplýsingar sem geti leitt til þess að morðinginn náist.