Kahn stoltur yfir ummælum Leonard

Breski hnefaleikakappinn Amir Kahn kveðst afar stoltur yfir þeim orðum sem goðsögnin Sugar Ray Leonard hafði um hann fyrir skemmstu en þá sagði Leonard að Kahn hefði alla möguleika á að verða sá besti í heimi. Kahn segir sjálstraust sitt hafa aukist mikið við ummælin, þó ekki hafi það verið lítið fyrir.

"Hann er ein af mínum helstu hetjum svo að heyra svona frá honum skiptir mig miklu máli. Svona ummæli auka sjálfstraust mitt. Ég er ennþá að horfa á myndbönd frá hans ferli og reyni að tileinka mér hans hreyfingar. Hann er einn sá allra besti sem uppi hefur verið" segir Kahn.

"Þessi strákur hefur allan pakkann. Hann hefur alla burði til að komast til Ameríku og gera fína hluti. Hann getur orðið sá besti," sagði Leonard meðal annars.

Kahn mætir Frakkanum Mohammed Medjadji í Wembley-höllinn þann 17. febrúar nk. og stefnir á að bæta við enn einum sigrinum í ferilskrána. Kahn hefur enn ekki tapað bardaga frá því að hann gerðist atvinnumaður.