Ekki verði farið í gegnum Teigskóg

Helstu náttúrverndarsamtök landsins hafa sent frá sér árskorun til Alþingis þar sem þingið er hvatt til þess að sjá til þess að Vestfjarðarvegi verði valin ný veglína með göngum undir Hjallaháls og Gufudalsháls í stað þess að fara í gegnum Teigskóg eins og umhverfisráðherra hafi heimilað.

Í tilkynningu frá Fuglavernd, Landvernd, Náttúruverndarsamtökum Íslands og Náttúruvaktinni segir að við blasi að slík göng séu besti kosturinn með tilliti til náttúrufars, umferðaröryggis, styttingar leiðar, lágmörkunar kostnaðar og hámörkunar arðsemi. Sú leið hafi hins vegar ekki verið skoðuð sem valkostur í mati á umhverfisáhrifum.

Með göngunum undir Hjallaháls og Gufudalsháls myndi umferðaröryggi aukast á Vestfjarðavegi og þá væri komið í veg fyrir skemmdir á Teigsskógi, að tveim gjöfulum arnarhreiðrum verði ógnað auk þess sem leirur Djúpafjarðar sem eru mikilvægar fyrir vaðfugla yrðu verndaðar.

Bent er á í áskoruninni að Teigsskógur sé víðáttumesti náttúrulegi birkiskógurinn á Vestfjörðum og með þeim stærri á landsvísu. Hann sé á náttúruminjaskrá og nær væri að huga að því að gera verndun hans hærra undir höfði, t.d. með stofnun friðlands og gerð fræðslustíga fremur en að rýra hann með vegagerð.

Vestfirðir séu í mikilli sókn sem ferðamanna- og útivistarsvæði og munu því bættar samgöngur til Vestfjarða með gangagerð nýtast ekki einvörðungu Vestfirðingum heldur landsmönnum öllum.