Úr fötunum eða ég sprengi

Alríkislögreglan í Bandaríkjunum rannsakar nú ránstilraunir sem framdar hafa verið að undanförnu víðsvegar um landið. Ránið fer þannig fram að maður hringir í banka og matvöruverslanir og segir að sprengja sé á staðnum. Hann hótar að sprengja staðinn í loft upp verði ekki orðið við kröfum hans sem eru þær að peningar verði lagðir inn á bankareikning og að allir viðstaddir klæði sig úr fötunum.

Síðasta tilvikið átti sér stað í gær í matvöruverslun í Kansas. Um 100 manns voru í búðinni þegar maðurinn hringdi. Umsátursástand skapaðist í búðinni en 90 mínútum síðar aðstoðaði lögregla fólkið út og höfðu sumir orðið við kröfu mannsins um að afklæðast.

Svo virðist sem maðurinn hafi aðgang að myndavélakerfum staðanna sem hann hringir í. Lögregla segir líklegt að honum hafi tekist að brjótast inn á kerfin og segir að hann gæti verið staddur hvar sem er á hnettinum. Engar sprengjur hafa fundist en ein verslunin varð við kröfu mannsinns og lagði tíu þúsund bandaríkjadali, um 650 þúsund íslenskar krónur inn á bankareikning. Lögreglan hefur fáar vísbendingar í málinu og enn hefur enginn verið handtekinn.