Danskir sjómenn komnir heim eftir 83 daga í gíslingu

Fimm danskir sjómenn af skipinu Danica White eru nú komnir heim aftur eftir að hafa verið í gíslingu sjóræningja í Sómalíu í 83 daga. Útgerð skipsins er sögð hafa greitt um 100 milljónir króna fyrir að fá þá lausa. Sjóræningjar réðust á skipið undan austurströnd Sómalíu fyrr í sumar og færðu það til hafnar.

Sómalía er stjórnlaust ríki vegna innanlandsátaka þannig að ekkert yfirvald var til, til þess að taka á málinu. Sjórán eru tíð í þessum heimshluta og sjóræningjar hafa ráðist á tæplega 300 skip það sem af er þessu ári.

Það var franskt herskip sem tók við dönsku sjómönnunum af sjóræningjunum og flutti þá fyrst í flotastöð sína í Djíbútí á austurströnd Afríku. Þaðan var flogið með þá heim til Danmerkur.