Heimsþekktur dansdómari til landsins

Dansgúrúinn Dan Karaty, sem hefur öðlast heimsframa með dómarastörfum sínum í þættinum So You Think You Can Dance, er væntanlegur til Íslands í sumar. Helgina 28.-29. júlí mun hann kenna upprennandi dönsurum hér á landi á dansfestivali Dansstúdíó World Class.

„Það verður mikið um að vera þessa helgi og Dan er hápunkturinn í því,“ sagði Nanna Ósk Jónsdóttir, deildarstjóri dansstúdíósins. „Hann er náttúrlega mjög þekktur sem dómari úr So You Think You Can Dance, og hefur getið sér góðs orðs úti sem danshöfundur. Hann hefur samið dansa fyrir þessar stóru stjörnur; Britney Spears, Kylie Minogue og Jessicu Simpson,“ sagði Nanna. Hún hefur áður fengið þekkta danshöfunda til að koma til Íslands og kenna hjá DWC. Darren Henson sótti DWC til dæmis heim árið 2005.

Koma Karaty hingað til lands á ábyggilega eftir að kveikja danslöngun í einhverjum, enda kveðst Nanna verða vör við gríðarlegar vinsældir þáttanna í starfi sínu. „Allir sem stunda dans hérna fylgjast með honum,“ sagði hún sposk. Námskeiðið verður opið öllum, en skipt verður í hópa eftir getu. „Ég legg mikla áherslu á það að þetta er fyrir alla,“ sagði Nanna.