Ræddi við FH skömmu fyrir aðgerð

Höskuldur Eiríksson ræddi í morgun við forráðamenn FH en hann mun í dag fara í speglun á vinstri ökkla.

Vísir greindi fyrstur frá því í gær að Höskuldur væri á leið frá Víkingi en FH hefur komist að samkomulagi við Víkinga um kaupverð.

„Það er nú ekkert frágengið eins og er en það er ekkert fjarstæðukennt að telja að við munum ná saman," sagði Höskuldur við Vísi.

Höskuldur var í vetur lánaður til norska úrvalsdeildarfélagsins Viking. Þar fékk hann engin tækifæri enda átti hann við þrálát meiðsli að stríða. Ökklinn er aðeins hluti af vandamálinu en ekki er útilokað að hann þurfi að fara í speglun á hné líka.

„Það er talið að liðþófinn er rifinn og það segir mér sá hugur að ég þurfi að fara í aðgerð vegna þess líka. Það er best að nota þennan tíma ársins til þess."