Vinnur með hirðljósmyndara dönsku konungsfjölskyldunnar

„Ég er ráðin inn sem ljósmyndari en þetta er reyndar svo nýskeð að það á eftir að koma betur í ljós hvernig starfinu verður háttað," segir Aldís Pálsdóttir, ljósmyndari í Danmörku. Aldís var í vikunni ráðin til starfa hjá Steen Evald sem er annar tveggja opinberra ljósmyndara dönsku konungsfjölskyldunnar.

„Steen hefur bæði það hlutverk að taka myndir fyrir þau persónulega og svo opinberar myndir. Það eru til dæmis myndir sem sendar eru til allra sendiráða, þessar innrömmuðu kóngamyndir, myndir á frímerki og fleira. Þetta eru sem sagt myndir sem þau vilja birta," segir Aldís sem er spennt fyrir nýja starfinu. Steen Evald er henni reyndar að góðu kunnur því hún vann með honum sem nemi fyrir nokkrum misserum, þegar hún var að ljúka námi í ljósmyndaskóla í Kaupmannahöfn.

Næg verkefni bíða Aldísar á nýja vinnustaðnum því Evald er bókaður upp fyrir haus að hennar sögn. „Það eru einhverjar tökur í gangi á hverjum degi," segir hún og viðurkennir að hún hafi ekki einu sinni haft tíma enn til að kynna sér hvenær næsta myndataka fyrir konungsfjölskylduna væri skipulögð. „Seinast þegar ég vann hérna fórum við kannski annan hvern mánuð. Þá var Steen reyndar bara að vinna fyrir Friðrik krónprins og Mary. Nú er hann líka farinn að mynda drottninguna sem ætti að verða skemmtilegt. Ég er annars mjög spennt fyrir þessari vinnu. Ég fékk að upplifa mjög margt þegar ég var hér síðast og hann virðist vaxa ár hvert svo það verður mjög spennandi að sjá hvernig þetta verður núna."

Aldís byrjaði í ljósmyndaskóla í Viborg á Jótlandi árið 2001. Frá 2004 hefur hún síðan verið búsett í Kaupmannahöfn ásamt kærasta sínum, Sindra Birgissyni, sem nýlega lauk námi í leiklistarskóla. Aldís kláraði skólann í október 2005 en uppgötvaði um svipað leyti að hún væri ófrísk. Síðan hún útskrifaðist hefur Aldís því að mestu leyti verið í fæðingarorlofi og eytt tímanum með dótturinni Magneu.

Hún hafði einmitt verið að velta því fyrir sér hvað hún ætti að taka sér fyrir hendur nú þegar dóttirin er komin á leikskólaaldur. Aldís segist hafa velt því fyrir sér að hafa samband við Steen Evald en hafði ekki enn komið sér til þess þegar hann hóaði í hana og bauð henni vinnu. „Ég sat bara heima og var að klóra mér í hausnum þegar hann hafði samband. Ég var svo mætt daginn eftir."

Fram að þessu höfðu Aldís og fjölskyldan verið að íhuga að flytjast til Íslands enda viðurkennir hún að þau séu komin með svolitla heimþrá. „En það verður víst að bíða aðeins."

Nýju vinnunni fylgja talsverð ferðalög og ekki er útilokað að Aldísi takist að sannfæra hinn konunglega ljósmyndara um að koma til Íslands. „Hann átti víst að taka tískuþátt á Íslandi í júní en það fékkst ekki hótelpláss fyrir allan hópinn enda var þetta í kringum 17. júní. Ég get örugglega hvatt hann til að gera aðra tilraun."