Knútur er ekki krútt lengur. Ísbjarnarhúnninn frægi, sem brætt hefur hjörtu gesta í Berlínardýragarðinum er að verða fullorðinn.
Beittar tennur, sterkbyggður skrokkur og gulur og tjásulegur feldur eru fylgifiskar þess að fullorðnast. Að minnsta kosti ef maður er ísbjörn.
Knútur verður sex mánaða í næstu viku og er orðinn heil 28 kíló. Hann er að verða að alvöru ísbirni og gæti fljótlega farið að verða hættulegur umsjónarmanni sínum.
Thomas Doerflein hefur annast Knút frá fæðingu og svaf í búri hans fyrstu mánuðina og mataði hann með graut og mjólk. Þeir leika sér enn fyrir gesti dýragarðsins en Doerflein hefur brugðið á það ráð að draga ermina yfir hendurnar þegar þeir eru í þykjustuslag vegna þess hve tennur húnsins eru orðnar beittar.
,,Hann er bara að leika sér og þetta er ekkert sárt, klípur bara aðeins. Það verður bara sárt ef hann verður reiður." sagði Doerflein, sem þegar hefur fengið nokkra marbletti, í samtali við Reuters.
Um fimm þúsund manns koma enn að sjá Knút á hverjum degi. Hann er að læra að synda og fer í daglega göngutúra til að byggja upp vöðvamassa. Þá er hann byrjaður að nærast á fiski og kjöti og bætir á sig um 200 grömmum á dag.
,,Hann stækkar og er að læra hlutverk sitt sem einfari" sagði Andre Schuele dýralæknir í dýragarðinum.
Knútur verður líklega ekki fullvaxinn fyrr en eftir um fjögur ár.
