Bryan Ferry: Dylanesque - þrjár stjörnur

Eins og nafnið gefur til kynna þá hefur þessi nýja plata Bryans Ferry eingöngu að geyma lög eftir Bob Dylan. Ferry hefur gert plötur með lögum annarra áður, en þetta er í fyrsta sinn sem hann gefur út plötu eingöngu með lögum eftir einn höfund.

Það kemur engum á óvart sem hefur fylgst með ferli Ferry að sá höfundur skuli vera Bob Dylan. Ferry hefur margoft lýst yfir dálæti sínu og djúpri virðingu fyrir textum Dylans og hann hefur áður tekið lög eftir hann, það fyrsta var A Hard Rain‘s Gonna Fall sem kom út á fyrstu tökulagaplötunni hans These Foolish Things árið 1973.

Það má að sjálfsögðu deila um gildi tökulagaplatna, en í tilfelli Dylanesque getur maður verið viss um tvennt. Í fyrsta lagi er öruggt að öll lög og textar eru afbragð og í öðru lagi má bóka það að þau eru vel sungin. Ég hef reyndar lengi verið mikill Ferry-maður. Hann er einn af mínum uppáhalds söngvurum; hefur rödd og raddbeitingu sem er einstök og sem menn annaðhvort dýrka eða þola jafnvel ekki.

Það eru ellefu lög á Dylanesque sem er að stórum hluta unnin með sömu hljóðfæraleikurum og hafa margoft áður unnið með Ferry. Lagavalið er fínt ef frá eru talin lögin Knockin’ On Heaven’s Door og All Along The Watchtower sem að mínu mati hafa bæði verið „koveruð“ of oft og of vel til þess að þessar útgáfur Ferrys eigi rétt á sér. Just Like Thumb’s Blues, Positively 4th Street, Simple Twist Of Fate og Gates Of Eden eru hins vegar frábær í meðförum Ferrys.

Á heildina litið er þetta fín plata sem rennur ljúft í gegn og þó að hún hafi ekki neitt nýtt fram að færa þá getur maður bókað að hún á eftir að hljóma jafn vel eftir 20 ár og hún hljómar í dag.

Trausti Júlíusson