Leikur Abidal með Eiði hjá Barca?

Evrópu- og Spánarmeistarar Barcelona eru sagðir hafa áhuga á að klófesta franska varnarmanninn Eric Abidal, leikmann Lyon. Fram kemur í spænska blaðinu Marca að viðræður við Lyon séu hafnar en Abidal hefur vakið töluverða athygli fyrir frammistöðu sína á síðustu misserum, bæði með franska landsliðinu og Lyon.

Er greint frá því að Barca muni greiða um 12 milljónir evra, jafnvirði rúms milljarðs íslenskra króna fyrir Abidal, en hann gekk til liðs við Lyon árið 2004 frá öðru frönsku liði, Lille.

Hjá Barcelona eru tveir Frakkar nú þegar, þeir Lilian Thuram og Ludovic Giuly.