Krafist að Marta Lovísa Noregsprinsessa afsali sér krúnunni

Krafan um að Marta Lovísa Noregsdrottning afsali sér titli sínum verður háværari með hverjum deginum. Hún er sökuð um að nota sér titilinn og frægðina sem honum fylgi til að græða peninga. Prinsessan hefur komið á fót skóla þar sem nemendum er kennt að tala við engla.

Það vakti mikla athygli fyrir nokkru þegar Marta Lovísa greindi frá því að hún gæti talað við engla og dýr. Nokkru síðar tilkynnti hún að hún væri farin í tveggja vikna veikinda frí. Það var rakið til álags eftir fjölmiðlaumfjöllun um meint tjáskipti hennar við ferfætlinga og vængjaða sendiboða drottins. Í síðustu viku veitti hún svo viðtal við norska sjónvarpið þar sem hún tjáði sig um englana sína. Hún sagði þá ekki líkamlega í venjulegum skilningi - heldur væru þeir kærleikur. Hún lagði áherslu á að það væri jafn misjafnt og mennirnir væru margir hvernig þeir skynjuðu engla. Engin föst ímynd væri til. Sumir þekktu þá og sæju og sumir heyrðu í þeim.

Prinsessan staðfesti að englar getu haft vængi, eins og á jólakortunum. Það færi allt eftir því hvernig menn sæju þá. Hún sagði að fyrir sér persónulega væru englarnir eins og ljósverur. Hún skynji þá sem mikla nærveru og kærleiksstuðning. Þannig horfi þeir við henni, og aðrir megi hafa þær skoðanir sem þeir vilja um það.

Þær skoðanir hafa nú komið fram í norskum fjölmiðlum. Leiðarahöfundur Bergens Tiden sagði í blaðinu í gær að Marta Lovísa ætti að afsala sér titli sínum. Hún noti hann til að græða peninga með skóla sem hún hefur komið á fót þar sem fólki er kennt að tala við engla.

Leiðarahöfundur skammar norska stjórnmálamenn og segir þá huglausa þar sem þeir hafi ekki tekið málið fyrir. Marta Lovísa sé prinsessa og mögulegur arftaki krúnunnar og verði að hegða sér innan ákveðinna marka. Vilji hún hins vegar sinna hugðarefnum sínum væri réttast að hún afsalaði sig titlinum. Norska konungsfjölskyldan hefur ekkert viljað tjá sig um málið.