FH: Í sérflokki síðustu sumur

Fréttablaðið hefur síðustu daga talið niður að Íslandsmótinu í knattspyrnu og við spáum FH-ingum Íslandsmeistaratitlinum. FH-ingar eru á eftir sínum fjórða titli í röð og margt bendir til þess að Íslandsbikarinn verði áfram í Krikanum. Liðið er frábært, breiddin einstök, umgjörðin glæsileg og ofan á allt heldur Hafnarfjarðarmafían uppi taktinum og stemningunni í kringum liðið.

Breiddin í FH-liðinu hefur líklega aldrei verið meiri. Ólafur Jóhannesson, þjálfari liðsins hefur talað um það að hann fagni því að hafa sitt sterkasta lið frá fyrsta leik og það er því ekkert því til fyrirstöðu að FH-hraðlestin bruni áfram frá fyrsta leik. Ólafur hefur sýnt mikla kænsku í að sækja sér leikmenn í þær stöður þar sem liðið vantar menn. Fyrir vikið er hvergi veikleika að sjá og jafnframt hefur brotthvarf lykilmanna ekki haft mikil áhrif á liðið.

Ólafur þarf í raun bara að hafa smá áhyggjur af því hvernig lið hans bregst við mótlæti. FH hefur verið á toppnum í 34 mánuði og það hefur allt gengið upp frá fyrsta degi síðustu tvö sumur. Hvað gerist ef leikir í fyrstu umferðunum tapast? Þar liggur von annarra liða því haldi FH-ingar uppteknum hætti og vinni fyrstu fimm leiki sumarsins eins og síðustu tvö ár er erfitt að sjá eitthvert lið halda í við þá.

FH vann í vor í fyrsta sinn bæði deildabikarinn og meistarakeppnina, vann 10 af 11 leikjum sínum á vormótunum og mætir með bullandi sjálfstraust í fyrsta leik. FH-liðið er betra en í fyrra og það verður erfitt fyrir önnur lið að ná upp sama stöðugleika og stemningu sem einkennt hefur FH-risann síðan hann vaknaði fyrir þremur árum.

Lykilmaðurinn

Tommy Nielsen hefur verið táknmynd stöðugleika og yfirvegunar FH-liðsins undanfarin tímabil. Hann breytti gríðarlega miklu fyrir varnarleik liðsins þegar hann kom í Hafnarfjörðinn vorið 2003 og FH hefur aðeins fengið á sig 50 mörk í þeim 61 leik sem hann hefur spilað í Landsbankadeildinni þessi fjögur sumur. Nielsen verður áfram kjölfestan í vörn meistaranna, hann er öruggur í öllum aðgerðum, sterkur í loftinu og góður á boltanum og það er því engin tilviljun að FH-vörnin er og verður svona sterk með Danann snjalla í fararbroddi.

X-faktorinn

Arnar og Bjarki eru komnir í Fjörðinn og enn ein viðbótin við frábært lið meistaranna. Þeir eru á síðustu metrunum á sínum ferli en hafa báðir getuna til að gera útslagið í leikjum FH í sumar. Verði þeir heilir kemur útsjónarsemi þeirra og reynsla örugglega til með að hjálpa FH á úrslitastundum mótsins.

Okkar einkunn

Þjálfari 10

Markvarsla 9

Vörn 10

Miðja 10

Sókn 10

Breidd 11

Liðsstyrkur 10

Heimavöllur 10

Áhorfendur 10

Hefð/Reynsla 10

Gengi síðustu ára

2006 1. sæti

2005 1. sæti

2004 1. sæti

2003 2. sæti

2002 6. sæti

2001 3. sæti

Gengi á vormótunum

10 sigrar

1 jafntefli

0 töp

Þar með lýkur upphitun Fréttablaðsins fyrir komandi átök í Landsbankadeild karla og spáin liggur fyrir. Í tenglunum hér fyrir neðan má sjá spá blaðsins fyrir öll liðin í Landsbankadeildinni.