Nafni Höfðahrepps breytt í Skagaströnd?

Hreppsnefnd Höfðahrepps hefur samþykkt að gera skoðanakönnun á viðhorfi íbúa til þess að nafni sveitarfélagsins verði breytt og tekið upp nafnið Sveitarfélagið Skagaströnd. Samhliða kosningum til Alþingis verður því gerð skoðanakönnun meðal kjósenda þar sem spurt verður um viðhorf til að breyta nafni sveitarfélagsins.

 

Í frétt á vefsíðu félagsmálaráðuneytisins segir að áhugi hreppsnefndar á nafnbreytingu byggi á því sjónarmiði að nafn sveitarfélagsins verði samræmt nafni helsta þéttbýliskjarna hreppsins.

 

„Nafnið Skagaströnd hefur um langt skeið verið nafn á verslunarstaðnum og þorpinu sem í dag er sveitarfélagið Höfðahreppur. Þótt það nafn hafi verið notað um sveitarfélagið síðan það var stofnað 1939 þykir hreppsnefnd það ekki hafa nægjanlega mikla samsvörun við nafnið á byggðinni og hefur oft valdið miskilningi um tengingu við hana," segir í frétt ráðuneytisins.