Ríkasti maður Noregs bak við lás og slá

Kjell Inge Rökke, ríkasti maður Noregs dvelur nú í fangelsi og verður þar næstu 30 dagana. Rökke hlaut fangelsisdóminn fyrir að hafa mútað skipaeftirlitsmanni í tengslum við lúxussnekkju sína og útgáfu á haffærnisskírteini árið 2001.

Rökke, sem hefur auðgast mjög á skipaútgerð, mætti í fangelsið í Hof í Noregi í gærkvöldi, degi áður en hann átti að hefja afplánun dómsins. Var það að sögn gert til að forðast ágang fjölmiðla.

Að sögn annarra samfanga Rökke hegðaði hann sér eðlilega fyrsta daginn bak við lás og slá. Og fyrsta máltíð hans í fangelsinu var pönnusteiktur lax með kartöflum.