Spenntur fyrir Einari Áskeli

„Ég hlakka til að hitta Gunillu og sjá hvað við getum gert saman, það er samt allt á samningastigi enn," segir brúðumeistarinn Bernd Ogrodnik sem mun mögulega gera brúður fyrir sjónvarpsþætti um Einar Áskel.

Sögupersónan Einar Áskell er íslenskum börnum vel kunnur. Bækurnar um hann hafa verið með vinsælustu barnabókunum á Íslandi frá því þær voru fyrst þýddar á íslensku. Alls er talið að um 90 þúsund eintök af bókunum hafi selst hérlendis.

Einar Áskell á líka aðdáendur úti um allan heim en bækurnar um hann hafa selst í um sex milljónum eintaka á heimsvísu.

„Gunilla Bergström, höfundur bókanna, sá mig með brúðurnar mínar í sænska sjónvarpinu og varð mjög hrifin. Hún hafði samband við mig og við erum í samræðum um að ég geri brúður fyrir bækurnar." Gunilla sá hann í íslenska sjónvarpsþættinum Út og suður sem hefur verið sýndur í sjónvarpi á Norðurlöndunum.

Bernd segir að margir framleiðendur hafi sóst eftir að fá að gera mynd eða sjónvarpsefni eftir bókunum en hingað til hefur Gunilla sagt nei við öllu því hún hafi ekki haft réttu tilfinninguna fyrir neinni af hugmyndunum. Þegar hún sá brúðurnar hans Bernds varð hún hins vegar strax mjög hrifin og sá þarna leið til að fara með Einar Áskel á nýjan vettvang.

„Gunilla er ekki mikið í tölvusamskiptum þannig að einn daginn fékk ég bara rosastóran pakka í pósti. Í honum voru allar Einars Áskels bækurnar og við erum búin að vera í sambandi síðan þá." Bernd segist ekki hafa þekkt sérstaklega vel til bókanna fyrr en Gunilla hafði samband og þetta hafi því komið skemmtilega á óvart. Til stendur að Gunilla heimsæki Bernd í Skíðadalinn seinna í sumar.

Bernd er Íslendingum að góðu kunnur. Hann var nú nýverið tilnefndur til Grímunnar fyrir barnabrúðuleikhússýningu sína Pétur og úlfinn. Auk þess hefur hann meðal annars gert brúður fyrir Ronju ræningjadóttur, Pappírs-Pésa, Klaufa og kóngsdætur og sett upp fullorðins brúðusýninguna Umbreytingu á Listahátíð í fyrra. Hann hannaði einnig og stýrði leikbrúðum í brúðumyndinni Strings.