Tryggvi og Helgi marksæknastir

Tryggvi Guðmundsson hjá FH og Helgi Sigurðsson úr Val komu að flestum mörkum sinna liða í Landsbankadeild karla í sumar. Tryggvi Guðmundsson gaf flestar stoðsendingar allra leikmanna í deildinni.

FH-ingurinn Tryggvi Guðmundsson stóð uppi skólaus á Lokahófi KSÍ en hann er efstur á blaði þegar kemur að því hvaða leikmenn Landsbankadeildar karla komu að flestum mörkum sinna liða í deildinni í sumar. Tryggvi átti líka flestar stoðsendingar af öllum leikmönnum. Fréttablaðið fer í dag yfir helstu tölfræðilista frá Landsbankadeild karla árið 2007.

Helgi Sigurðsson úr Val og Tryggvi Guðmundsson úr FH áttu þátt í flestum mörkum sinna liða í sumar en báðir komu þeir að 17 mörkum. Helgi skoraði 12 sjálfur, átti þrjár stoðsendingar og félagar hans fylgdu tvisvar á eftir skoti hans og skoruðu.

Tryggvi skoraði 8 mörk sjálfur, átti 8 stoðsendingar og fiskaði eitt víti sem gaf mark. Markakóngur deildarinnar, Jónas Grani Garðarsson, kom síðan í þriðja sæti en hann kom að 15 mörkum Fram, skoraði 13 sjálfur og lagði upp önnur tvö.

Fjórir leikmenn Landsbankadeildarinnar náðu að fiska tvö víti í deildinni í sumar. Þetta eru Fylkismaðurinn Páll Einarsson, Framarinn Kristján Hauksson, HK-maðurinn Oliver Jaeger og Víkingurinn Gunnar Kristjánsson.

Það var FH-ingurinn Tryggvi Guðmundsson sem gaf flestar stoðsendingar allra leikmanna í deildinni í sumar en hann átti síðustu sendingu fyrir átta mörk félaga sinna. Þetta er besta ár Tryggva á ferlinum hvað varðar stoðsendingar en hann hafði mest áður gefið 7 stoðsendingar sumarið 1996. Tryggvi hafði samanlagt gefið 8 stoðsendingar fyrstu tvö tímabilin sín í Kaplakrika.

Valsmennirnir Guðmundur Benediktsson og Baldur Aðalsteinsson komu næstir á eftir Tryggva með sjö stoðsendingar en Guðmundur var hinsvegar sá leikmaður sem kom að undirbúningi flestra marka á tímabilinu.

Guðmundur átti þátt í undirbúningi 13 marka Valsmanna, gaf eins og áður sagði 7 stoðsendingar en átti auk þess 6 sendingar sem voru ekki síðasta sending en áttu mikinn þátt í undirbúningi markanna. Guðmundur hafði átt flestar stoðsendingar tvö síðustu sumur og hefur nú alls gefið 26 stoðsendingar og átt þátt í undirbúningi 38 marka í 53 leikjum í Valsbúningnum síðustu þrjú sumur.

Gunnleifur Gunnleifsson, markvörður HK og Fjalar Þorgeirsson í marki Fylkis voru efstir yfir tölfræði markvarðanna. Gunnleifur var, eins og áður hefur komið fram, efstur markvarða í einkunnagjöf Fréttablaðsins en hann var einnig sá markvörður sem varði flest skot í leik. Gunnleifur varði 92 skot í leikjunum 18 eða 5,1 að meðaltali í leik. Fjalar var hinsvegar sá aðalmarkvörður sem fékk á sig fæst mörk í leik (18 í 18 leikjum) auk þess að halda oftast hreinu (8) og verja hæsta hlutfall skota sem á hann komu (77,5 prósent).ooj@frettabladid.is