Þorvaldur nýr þjálfari Fram

Framarar hafa sent frá sér fréttatilkynningu þess efnis að Þorvaldur Örlygsson hefur verið ráðinn þjálfari Fram. Þetta kemur lítið á óvart en Vísir greindi frá því fyrir helgi að hann yrði næsti þjálfari Safamýrarliðsins.

Þorvaldur skrifaði undir samning til tveggja ára og tekur við af Ólafi Þórðarsyni sem tók við liðinu fyrir einu ári. Fram hafnaði í sjöunda sæti Landsbankadeildarinnar í sumar.

Fréttatilkynningin frá Fram:

Þorvaldur Örlygsson var í dag ráðinn þjálfari meistaraflokks karla hjá Fram til tveggja ára. Þorvaldur er 41 árs Akureyringur sem þjálfað hefur lið Fjarðarbyggðar síðastliðinn tvö ár með góðum árangri.

Þorvaldur býr yfir mikilli reynslu eftir farsælan feril sem leikmaður erlendis og hann hefur náð góðum árangri sem þjálfari og það er okkur mikil ánægja að hann skuli hafa tekið að sér starfið. Viðræður gengu hratt og vel fyrir sig sem lýsir vel áhuga beggja aðila fyrir samstarfi.